Šuško Lučica
daleko je don
barba Ivon nosi ferol
šjora Marica tuče biljete
u kapotu povar daleke vešte
smardi garbura,
guzo se skala
ko će izdurat duoč do kraja
Buol
Milna
Bobovišće
i apiena Split
da je ostat doma
nikud ne hodit
muka u štumak
tiši me mat
uz ruke Božje
barž će i bonacat
zafišćeto je vapuor
potiegla cima
digla skala
tuko hodit naprid
molat se od kraja
Malo po malo
jedon za drugin
partijedu naši drogi stori
umiredu kako stori hrebi
kad se izlavuraju
za fameju namaknu
unuke-praunuke-doškodu
fermodu otpočinit
za sve ča za života
nisu počivali
kad se ure istočidu
molitve izmolidu
a svića dogori
duša se od tila odili
– i onda,
di si bi
ča si čini
ako prid Bogon
nis zadobi
Ni danas nison sigura
ča to hoće reć
a cilega dinstva
igrali smo na rovinjiež
na jednu nogu skokali
pisak iz kućice u kućicu turali
kojin gušt ne falit
sve kućice priskočit
a kad bi doma duošla
mat bi odma poznala
da son na rovinjiež igrala
ne bi vikala
nego bi uvik isto ponovjala
-opet si punte od postolih rovinjala
kako nison mogla znat
da je rovinjiež isto ča i rovinjat
-a ko će znat….
-Bila jedna baba Graba
ona je išla u šumu
k njon je duošla vještica…
tako non je provjo naš otac
kad smo bili moli
mat bi ga poslala
da bude s namin dokli zaspimo
a ovuon bi parvi zaspo
onda brat i sestra
jer su bili mlaji
a jo son ga uvik itila pitat
ča je bilo daje
ma kad bi sutradon
opet zaspo i zahorko
bilo bi mi žol probudit ga
…i tako je vrime pasovalo
mi smo nariesli
a naš otac je zauvik zaspo
i jo ni don danas neznon
ča je bilo daje
Kuo govori da hi ni
da su oči zatvorili
ruke prikrižili
tilo umartvili
kuo govori da hi ni
da ne čuju
i ne znaju
ništa da ne lavuraju
kuo govori
da hi ni
kad je nad Gradinon
svaku večer
mijor zvizd
Koliko zgarčenih škinih
koliko ruk
koliko pota
a tukalo je i imat mota
za sve ovo stinje
kargat
privarč
na gomilu stivat
za pinkicu zemjie
veće imat
Ogonj
dim
dim
ogonj
izgori je naš Obćinski dom
usrid mista
kraj žardina
priko stuo godišć
na diku svima
izgorili su libri
sve je izgorilo u čas
ogonj se ni mogo fermat
izgorili su libri
ma i stori foji
sve ča je bi znamen
v e r b a v o l a n t
s c r i p ta m a n e n t
-i ča ćemo sad
kako ćemo naprid
noč ćemo se napožat
vroti čedu se libri
sve će duoč na svoje
ma tuko učinit sve
da se vroti znamen
AMEN