Fola ti naš Pere
Ča si slidi pute
Naših drogih storih
Onih ča su pri nos
Svoje križe nosili
Lavurali i molili
Životima trudnin
Nebo zaslužili
Fola ti Petre
Ča si svojin za križien
Mlodima našima
– I onima ča čedu bit –
Pokozo kojin putien
Vajo hodit
Za se ne izgubit
Svitlost križa slidit
Moj brat Jurko lipo doško
Drugi Jure na svit duošo
Ća ćeš boje, ća ćeš lipje
Doškot dicu svoje dicie
Razvesel se brate mili
Digni glovu, čelo digni
Buog je velik, čuda čini
Radujete se i veselite
Storih naših se spomenite
Blagoslov von svima šaje
Storo teta lozie vaše
Isfregoni podi
suprašone tavaje
izluštrone veltrine
kuverturi s fienton
priko postejih
vuonj čistoćie
svitlost borića
teplina Betlema
tri kroja mudra
i svieta
zvizda s riepuon
kažije nin put
molitva za mortve
blagoslov za žive
remeta
kurot
svakega godišća
na isti muod
Kuo je mogo mislit
da će opet duoć na svoje misto
posrid žardina
okrienjet muoru
veli čovik, na velu poltruonu
a dogodilo se
po storemu zokonu
da ne pločo Buog svaku subotu
meni se parilo
kako da se i vrime vrotilo
i kako da su svi duošli na svoje
i oni u žardinu
i oni ča su na Gradinu
a i oni ča čedu duoč
jer je jedino provi
Božji zokuon
Pasali su godišća
ma je evo duošla prilika
da se može reć i ova besida
jerbo ni se duošlo na manje
kad ni Čugo, osto je P AP E
a pape i Čugo jedno je isto
nuono je duošo na svoje misto
– naš pape, zvi znodu
nikako ni bi za Molu Bondu
ma posli svega ča se učinilo
ovuon bi reko
– imojte puomnju od života
nemuojte za svaku bacelat
boje po manje, a s miron lavurat
svakega juski dočekot
nemuojte puno u žep gledot
ne zaboravte store užonce
od svakega imojte krejonce
somo tako hodićete naprid
poštujte druge
neka je Buog s vamin –
Od subote na nediju
baš na svietu Mandalinu
moli Jure svit ugledo
divota ga je pogledot
lipi, moli, šesni, čorni
svima nin je mili i drogi
a nojveće zno se komu
materi i Luki ocu
– u fameji našon, storon
Luka, Jure se ponovjo
moli Jure ried nastovjo
neka mu je nasnovono
uz pomoć Božju i Divice
živi u zdrovju
i s puno sriće
Di su bačve,karatili
di su dižve i maštili
mizaruole i bigunci
mieške,koce
libonj,lisa
škruove,loze
di su misi i tovari
tartajuni za zapartit
i zovuze za napartit
-sve nestalo,
sve propalo
ma se nošo
jedon Andro
nošla se je i konoba
puno stora, a kaj nova
miri, griede i ponare
zaponitili sve su vonje
trudih, mukih i nevoje
kamenice na sve bonde
skrepenili ričih skonse
ni već stroha, ne pensojte
ništa ni propalo
u Androta konobu
sve je za vike ostalo
Luovretovih dvuor
konoba
fumor
bucol od gustirne
i sve stine
griede
prazi
sve na svoje misto
a ništa ni isto
oživilo
prohodilo
iza sna se probudilo
-drugo vrime
drugi judi
ma su storo rešpetali
i mlodima pokozali
-hodit naprid
ne pogazit storo
to je provi put od mire
s blagoslovon naše vire
Zvizde na nebu
feroli na zemji
sunca ni
a svitli Križ
muka Isukarstova
prtisla puk
i duše od pargatuorija
ča čedu s namim na put
koće hodit neka grie
naš Križ partije
Partijedu Križi
svi u isto vrime
u rukamin Križonoših
sarca punih vire
batištrada put kažije
uz poja gomile
kantadurih konti
priskočedu vike
nut mislimo svi mi danas
ki na Križu umri za nas
Priko pietstuo godišć
uvik na isti muod
-svu nuoć tuko
hodit
molit
kantat
tuko izdurat
zdravi dobrostivi Isuse
Piet siel tuko pasat
u svaku crikvu intrat
molit
kantat
tuko izdurat
zdravi dobrostivi Isuse
Kad zora zarumeni
još hodit
molit
kantat
tuko izdurat
zdravi dobrostivi Isuse
Hodit
molit
kantat
i na zodnju
priko pjace se zatarkat
klanjamo se tebi Isukarste
Izdurali su
izdurali smo
izduračedu
ovi presesjuni
nikad niečedu pasat
niko hi nieće moč fermat
naš čovik će uvik dreto hodit
lavurat i molit
svitlost Križa slidit
Ča je Božić
moli Buog
ditić
svitlost
teplina
milina
lipota
vuonj tamijana
onđeli iz raja
sve kaj jedon
k a n a t