Category: Poja i mista

Iga,

Pumpurela

i Kanun

kako tri parsta

od ruk

a opet svaka

na svuoj muod

da u vali bude

boji uguod

Išli su daleko

priko muora

ma ni u Amerike

ni u Novu Želondu

nisu znali

ni di griedu

ni kad čedu se vrotit

žene

dica

i stori

bi je rat

poslali su hi u zbijeg

u El Shatt

duošli su u pustinju

kraj muora Carvenega

i barda iz Storega zovita

nindir ništa

somo salbun

užorena prašina

pustinja

duošli su za se škapulat

a ko če u pustinji izdurat

nisu dangubili

posla su se čapali

lavurali i molili

od šatorih

grod podigli

otvorili skule,crikve

Za Križien hodili

tuja zemja,

drugi vitri

praži sunce

puše gibli

a pensiri uvik isti

tuko izdurat

doma se tornat

kojin koroj

koja voja

koja snoga

u dvi riči

-vrotit se doma

nisu svi sriće imali

nisu se svi doma tornali

molo dica,stori judi

nisu izdurali

u pustinji

kopošon osto

svako ime i kazota

jedon život

jedon život

kako svi životi

nemuojmo El Shatt

zobit

Na bardu

visoko

od muora

daleko

vele

bile

drete

stine

izjuštone

nastivone

prijubjene

izluštrone

izluštrone kroza vike

kroza vrime i nevrime

od Teute krajice

kako u librima piše

govoridu tako

ma ko će znat

kuo je,kada

zoč i kako

ove stine

vele stine

na bardo išo

izdreti, izjušto

govoridu tako

ma ko će znat

od Tora tuko

rešpet imat

Čarčojci čarčidu

bose noge

stinčice brojidu

okolo posa

tikvice zvonidu

molo žolo.

Molo jama

Velo jama

pagarešto!

skoč

ne čekoj

Na Račiću

navar mista

stotin godišć

stoji crikva

Guospa od zdrovja

Guospa od zovita

naša Guospa

od Račića

štovoli je naši stori

štujedu je veli,moli

zazivaju u njie milost

i za zdrovje i za kripost

u bolesti i nevoji

i u tuzi i u boli

utiha je bila svima

naša Guospa od Račića

i na muoru i na kraju

u vojništvo

ol na skule

u daleke ziemje tuje

čuvala si svoju dicu

kaj ditića na svon krilu

ča smo daje

sve si bliže

Guospe naša zaštitnice

Guospe od zdrovja

Guospe od zovita naša Guospe od Račića

Postrižene, polivene

očišćene, umivene

zagarjene, namušćone

blišćidu se

na sve bonde

po varhuovcih sve

mladice

činjodu se

kaj divnjice

ispod njih je

kaj na pjatu

svaku vidiš

kaj na dlanu

kad zatrieseš

poskakuju

u čas vriću

napuhuju

-kamenica puna uja

somo po dnu

pado murga-

Priko mosta

uz potok

tisni putić

jedva čekoš

loznicu otvorit

svukud lozjie

bojdanuša

grozdi veli

gušt je targot

za gradacijun

ni za hajot

Uormanice spija

puno kiča

puno gnjoja

puno dor

bidan tovor

Pud  Lučice

za Gradinu

pasat Minu

velu plimu

priko rata

Potaršćie pasat

Pogomilje

ne hod tamo

priko rata

puoj onamo

prid kućicon

apiena stat

i s nuonoton marendat

Kako krajica

usrid mista

lozjie kaj taršćie

omiendulih do politka

arbikoki kaj cekini

dvi gustirne za introdu

kamenica za vidriljuolu

a kućica posrid laza

s kapelicon pul zopada

zimi liti nimoj stroha

dosta je somo reć

L i b u o r a