Category: Judi

Kašete

sardele

barili

Puntin

sve u motu

sve se blišći

svičarice u puortu

zaslužili son

ribori se umorili

doma vajo puoč

na Puntinu

ribe kaj žola

cakletidu se sardele

koluron od srebra

iz kašetih u barile

solidu hi

ruke vridne

i domoći i furešti

Paričani vični ribi

judi mirni

puno vridni

pustih godišć

u Jiesu dohodili

na ribe hodili

s malo ričih

s puno mota

lavurali kaj jedon

vas Puntin sadrdelima vonjo

-vrime uteklo

sardele nestale

di su se izgubile

ko će znat

barž bi tukalo opet

Paričane zvat

-ma sad čemo na Puntinu

barienko monumient imat

Navar glovie

klobuk

košuja s ošvicon

na botun

moli barci

rumeni obrazi

uvik vesel

dobre noravi

kako i svaki težok

poje je voli

ma i na konju

poštu po selima nosi

beštije liči

a nojveće od svega

unuke voli

Uvik je Boga molila

u crikvu hodila

namin dici bi govorila

-imojte puomnju od života,

Boga se buojte

paklene muke

su nojgora strahota,

a dobra dila

novjeća lipota-

i još nin je provjala

kako non je skula

puno dobro hodila

i da je meštrovica mogla bit

da je itila

ma se u nuonota Morkota namorala

i za cili  svit

ne bi ga bila abandonala

S nonon je uvik

u poje hodi

lozjie,masline i smokve

s puno jubavi ašešti

jedini je u   fameji fumo

španjulete son mu kupuvola

dobota svaki don

-i meni je tabak

lipo vonjo-

sestramin u Amerike

kad bi piso

navar nosa bi očole natakni

u crnilo pero moći

na tonkon korti

puno lipih ričih isloži

u konobu i pod taracu

balonce je daržo

sve bi miri i notovo

u jematvu nikad ne bi fermo

sve je na oku daržo

u svemu jušt i prov

a kad bi vino prodovo

bark bi mu se nasmijo

bi je vesel i kuntenat

od vina je živila

cila fameja

Mahrama navar glovie

fušton do poda

ni bila visoka

ma lipo sjuštona

nasmijona i rumena

uvik se škercala

svakon je spartici

provislo noč znala

s nuonoton je u poje hodila

sve posle po poju činila

za posle po kući manje je morila

od nedije na velu misu

bez murtele ni hodila

sa šjoron Anticon

iz crikve izahodila

uvik dobre voje

kako da non je sve nasnovono

i od Boga dono

Koliko je škrokojih

moja mat učinila

ča je sve znala i umila

koliko putih

sve na slavu Božju

i dobrobit fameje

naminila

još ćutin vuonj kafie

ča bi je bruštulala

i samlila

s kuozjin mlikuon

bilu kafu učinila

vuonj kapuca,šolše

ribe samaštrone

sardelih u savur

ča bi hi hronila

u muškadur

za blojdone i fešte

cviti,sirnice i pašurate

do navar kole bi vonjale

gledon je kako u  kopanju

tisto misi, bine umisi

u peći ispeće

kruh porumeni i narieste

na teracu suši smokve

i konšiervu

u jematvu konfet i kotonjatu

na dvuoru sapun čini

robu pere, lušijo, deškargo

na Slatinu režento 

iz glogoja vodu

na glavu nosi

novu robu kroji

imbazdo, na makinu gažijo

kjučicon mirliće plete

joglima kalcete isplete

tašeloje, karpi

pode frego

suprašon na žeravu

svu robu suprašo

ašesti mole i store

beštije i poje

A di je rat

otac u El Shatt

Gromin Dolac

jo i brat

dvo fagota

materi na rukamin

bez fermat

– koliko je škrokojih učinila

moja mat

Vidin je i sad

kako od nedije

na misu priši

a ako i zakasni

Buog sve razumi

i nieče je kaštigat

jer lavur je kako i

molitva

a prin je posluh

pok je  posvetilišće

koliko je putih ove riči

izgovorila

Znon da i sad

kad već s namim ni

a Buog je raja napoji

ne dangubi ni vrime ne trati

ma nojveće penso obo namin

i Boga moli da izduromo

neka nin je sve nasnovono

– koliko je škrokojih

moja mat učinila

sve na slavu Božju i dobrobit fameje naminila 

Dreta, šesna

žvielta, umitna

nikad stat

nikad fermat

uvik lavurat

sve ućinit

svakemu dat

bez puno pensat

milo i drogo

moja mat

ko će je dat

Kakuov je bi

naš otac

i zoč ovo danas

jer već ga ni

a meni se pari

kako da je s namin

i ne somo da mi se pari

nego tako i jie

i kako da mu je

lašnje i lipje

Ni mu bilo lako

ova dvo zodnja godišća

ležat bez fermat

sve razumit

ne moć govorit

ma sve je tarpi i podnosi

nasmijon bi

sve do prid zodnju

a kako se svima veseli

kad bi du mu dohodili

jer svi su ga volili

ići je puno tega reć

ma ni mogo

a isto smo ga razumili

i sve mu ča smo mogli

učinili

zno je ovuon sve

ča to hoće reć

ležat i nemoć

a sve imat

i milošću i kripost

zoron pri nego bi se rasvanilo

i Zdrava Marija zazvonila

brat bi ki ocu dohodi

bez puno ričih

a s jubavi plimon

i velikon viron

da će ocu boje bit

i da će opet moć

na Libuoru hodit

kad bi sestra dohodila

odma bi ga čapala

podišala kargala

od posteje deštakala

i privargla

jer ona je sve

kako i naša mat

žvielto lavurala

jo bi dohodila sa strohon

po donu i mrokon

jer mi je veliku muku čini

ni kriv ni dužan

a leži

nevistu je voli

ma na drugi muod

i puno je rešpeto

sa svin ča bi rekla

uvik se slogo

sve unuke je voli

i tako nin se veseli

da bi mu sarce narieslo

i oči se zacakletile

od velike brime

ma kad bi nojmlaja

u kamaru intrala

kako da bi i arija zakantala

od svih mu je bila

nojdražja

a tuko reć zasparvu

bi bi voli da je po mušku

ma se žvielto prikuverto

i u nojmlaju namoro

i propja kako da mu je

Buog poslo

da mu starost začini

i prid Bogon zadobije

Kakuov je bi naš otac

i težok i zidor

u mladosti i ribor

čovik od šesta

od lavura

i od ričih

škiercih i batudih

dret i neka je bi kriv

jer bi je Čovik

I sad kad ga već ni

još je veće s namin

jer ostali su

njegovi trudi i lavuri

potienje i dobrota

i visina do Neba

di je sada

s našon materon

i sa svima našima

ča su Nebo zaslužili

svojim životima-Križima

somo tako

čovik ne umire

nego žive i daje

od svojie vire

Dico moja takuov je bi

NAŠ OTAC

Gledola son hi izdaleka

ne znoš di je čovik

ča je zemja

-ni vrime za dangubit-

rekla bi mat

danas su tuji

zoron su se ustali

pustu ziemju

pripuli.privargli

oglodnili.ožiednili

svaku kripost zaslužili

vazmi bronzin i buoršu

dreto hod

ne gledoj na bondu

kako da je znala

moja mat

da u primaliće ni lako

ne gledodot na bondu

kad okolo tebe

sve blišći

vonjo.kanto.leti

stuo kolurih

u jedon se učini

-ma isto son puomnju imala

s proznin bronzinon

pul doma bi skokala

Moli čovik

velo sarce

oči čelešte

pune teplinie

i brame

siri vlosi

rumeni obrazi

žuti barci

navar nosa očoli

u jednu ruku buorša

u drugu ščop

po hodu bis ga pozno

kad bi u kuću intro

iz kamare bi stroh nesto

uvik lipe riči

i dobre šperonce špjego

u svako doba

po svakemu vrimenu

bolesnike obahodi

po potribi i tovarčićen hodi

bogate i siromašne

ni dili

puno putih

medicinu ploti

dobre svite uvik dili

svakega čovika

stimovo i voli

kad son se rodila

uz moju mater je bi

-fola mu za sve

ča je učini

-velo sarce

dobra dila

provi čovik

doktor BRIDA