Category: Nesortirano

Sôla

Komo

Na kômu

svića

Pavier dogorije

Nono uje

Nadolije

Naša  molo

“Kokota zaklala”

Divnja postala

U svako doba

Žena more bit

Uz pomoć Božju

Dicu rodit

Store zaminit

Stonje ašeštit

A fameja

Naprid hodit

*Zapisano po sjećanju na kazivanja naših starih Kukelj(?) t. Tonke – kad je Beba postala divnja

Ča no nuono

infišo gledo

i to pul neba

a ne pul poja

još je stavi i očole

za ne falit

i ne reć jednu za drugu

-onin oblok povar Murvice

nieće izlagat

oblok priko Broča

hoće reć

da će bit velega maštrola

Provjo mi je barba Gorgo

kad je Čugo u nos lavuro

vele ti je muke Kati zado

svaki put bi mu, kako unefol,

inkarat dreto u vidricu po

po dvo, tri puta

Kate bi na Slatinu hodila

vidricu na glovu nosila

ma se ne bi isidila

odma son zno

da je Čugo Katu sinjo

-juski dikmon,jusko divnja

oba vridna-goorila je

moja mat

i ona je adočala

da se jubov zavargla

koliko je putih Čugo

našon kolon pasovo

somo da bi Katu iskontro

onda ni bilo kako sad

ludilo se pomalo

izdaleka

do matrimounija znalo je

i koje godišće pasat

-ovo son ti ispripovido

da moreš znat

kako su se počeli ludit

mat ti i otac

Grien

griješ

grije

grijemo

grijete

grijedu

svi grijemo

i svi ćemo

jednega dona stat

somo vrime

nikad nijeće fermat

Opet breco zvuon

i opet je porti

jedon

jedon u misto manje

jedon na Gradinu veće

jedon po jedon

svi na kopošon

Tukalo se kruto rano ustat

još bi bi mrok

puhala bi bura

ili bi pado dorž

a onda bi zazvoni zvuon

zvuon iz Račića

nojlipji zvuon

ča bi niz Račić

onđele poslo

ni već bilo

ni zimie, ni stroha

učas bis duošo

našon Guospi od zdrovja

Bila son molo

još nison u skulu hodila

kad je moja teta

pud Amerik išla

zoč u Amerike

zoč tako daleko

na kroj svita

a vamo je sve  zeleno

po kući su se svi vartili

ništa nisu govorili

somo je moja teta

bila kuntienta i vesela

posli son doznala

u Amerike je mlodega imala

ma je duošo onin nevuojni

Drugi rat

i ni se moglo putovat

kad je rat isvarši

po prokuri se odola

izvadila pašoj

i portila na vijoj

-brodon ča se Partizanka zvo

to mu je bi zodnji vijoj-

koliko je pismih

moja teta napisala

koliko paketih poslala

koliko je putih naša nona

isto pismo štila

koliko putih suzu pustila

a teta je pisala

da ne razbijemo glovu

da je tamo sve na botune

i da se po kući umorit ne moreš

sve i da hoćeš

ma je puno zemjie

a nindir stinie

ako hoćeš zašparenjat

po cili don tuko u poje lavurat

tako je moja teta

od jutra do mroka

u poje lavurala

uvik stinu iškala

stinu iškala

ma je ni nošla

sa stinuon u sarcu

zauvik zaspola

Svakega godišća

sve manje poznotega svita

sve veće proznih kuć

ni ženie u dalekemu fuštonu

ni s mahramon

ol sa sparon

tovari ne ričedu

koze ne biečedu

kokoti ne kukuričedu

ne sušidu se smokve

ni konšierva

ne beredu se karobeli

ne ćuti se vuonj murtele

ni garifulih pod purtele

ure drugačije batiju

zvona na drugi muod zvonidu

ne provjodu se gončice

ne govori se obo introdi

svak za sebe

jedon za drugega ne mori

-Bože muoj

ča se ovo dogodilo

-vrime je svoje učinilo

a mi bismo ičili

da sve ostane

kako ča je bilo

Ča von se pari

kumpore

ča će bit

od ovie introde

-ne pitojte čamudrogo

ol’ ne vidite

da je sve bulono