Zamukli su glosi
izgosi se ogonj
ne dimi fumor
ruzina privazela
sve krakune i šćence
paučinon vitar mete
loza se inkantala
polma usahla
tičice odletile
maške utekle
škripjedu škure
cedijedu cakla
-somo svieti Antuonij stoji
kako ča je uvik sto
u kapelicu navar skol
Već je ni
a bila je dobota cili vik
otkad je naš otac
u vojništvo bi
polma u našemu dvuoru
kad bi govorit znala
ča bi sve ispripovidala
kako jorbul kuću je čuvala
tičicima gnjizda sakrivala
za pofale lišće darivala
sve je u našemu dvuoru bilo
okolo polme, pod polmu, iza polme
koliko se svita izminilo
koliko ričih izgovorilo
vina pritočilo
robe oprolo
ribe očistilo
sve pod polmu, okolo polme.
Pasovali su godišća
a polma uvik ista
svakemu je vrimenu
i nevrimenu odolila
– ma kad se kuća isproznila
kako da je sve ćutila
s namim je tugovala
i kopnila
svaki don sve veće u se išla
na manje dohodila
nakrivila se. osušila
od tugie dospila
već je ni
a bila je dobota cili vik
polma u našenu dvuoru
Kruov u suncu
dvuor u hlodu
tičice kantaju
i šušuraju
judi lavuraju
arija se blišći
sve u motu
ništa ne stoji
Tri zvizde
navar fumora
misećina
razblišćoje škure
baršjon okolo polme
kako jorbul
svitnjok svitli
sve muči
Zatvori se Vrotnik
zalampalo priko Glavice
svietega Mikule
zagarmilo priko Poljenice
-stojte doma
ni pud poja za hodit
neviera se zavargla
baš će bit i grada
šan Šimon
i Barbara šanta
Danas son
u Gospotovu rapu.
na Velu jamu
nošla pisak
ča smo ga sakrivali
kad smo bili
puno mlaji
u istu škrapu
pod istu stinu
uz isti brok
kako da je pasalo
godišće don
a vela su godišća
pasala
patina ga čapala
ma jo son ga
od parvie poznala
Kad son se parvi put
namorala
nison ni znala
ča to oće reć
ni da od tega nemoreš uteć
najedon put se arija
razbliščala
teplina me čapala
nison hodila
nego letila
mat mi je ništo govorila
nison je razumila
barž je i pado dorž
a okolo sarca
kako da je moj
Modro
zeleno
čelešte
siro
škuro
kako nebo
ča se u njemu gledo
po jugu se vojo
po buri pini
po maštrolu poskakuje
po bonaci kako uje
uvik minjo kolure
Muore zarcalo neba
muore zarcalo dušie
Kad se rodiš na otoku
nosiš ga sa sebon
kako dotu
i kad duojdeš na tera fiermu
i već ne vidiš nijednu lantiernu
kako da i busulu izgubiš
di guod da ideš
rive nindir ni
rive dhi se muore
s krajen bušije
di sve počinje
i zavaršije
Muore, zarcalo neba
muore, zarcalo dušie
ča si daje
sve jače ga čutiš
sve veće ti fali
zove te nose
ne moreš odolit
Zatuo smo sad ovuod
na otoku
na našemu škoju
di su svi koluri
i svi vonji
ričih skonsi
muoren umiveni
muoren začinjeni
Zatuo smo sad ovuod
di smo parvie škrokoje učinili
parvo slova naučili
Za Križien hodili
Zatuo smo sad ovuod
di moure ariju raščaro
misal razbistri
okolo sarca
teplinu namisti
Zatuo smo sad ovuod
na otoku na našemu škoju
di se muore s krajem bušije
di sve počinje i zavaršije
Muore zarcalo neba
zarcalo dušie
Stoji
muči
done broji
nindir nikoga ni
ni lavura, ni šušura
ni koronjo, ni kantonjo
sve umuklo
sve zamuklo
u se se uvuklo
skrepenilo, inkantalno
da ne bi kuo čo dotako
sve bi se raspalo
dvuor bi zaplako
šufit zastenjo
lantone i tarace
duošli bidu na manje
puste hi da miruju
da se sobon zabovjaju
i pensaju
obo svima ča su prage udubili
lavurali i molili
životima trudnin nebo zaslužili
puste hi da miruju
da se sobon zabovjaju
storu kuću ondjeli čuvaju
Ure
dnevi
štajuni
godišća
vik za vikon
čovik za čovikon
moli
veli
stori
čovik nose
vrime naprid
ne moreš ga čapat
ne moreš ga fermat
ma ga moreš pripoznat
sidi vlosi
pogarbjena škina
nagrišponi obrazi
udubjeni prazi
vrime duro
vrime naprid grie
vrime se ne strušijoje
strušijo se čovik
koji u vrimenu žive