Na bardu
visoko
od muora
daleko
vele
bile
drete
stine
izjuštone
nastivone
prijubjene
izluštrone
izluštrone kroza vike
kroza vrime i nevrime
od Teute krajice
kako u librima piše
govoridu tako
ma ko će znat
kuo je,kada
zoč i kako
ove stine
vele stine
na bardo išo
izdreti, izjušto
govoridu tako
ma ko će znat
od Tora tuko
rešpet imat
Svakega godišća
sve manje poznotega svita
sve veće proznih kuć
ni ženie u dalekemu fuštonu
ni s mahramon
ol sa sparon
tovari ne ričedu
koze ne biečedu
kokoti ne kukuričedu
ne sušidu se smokve
ni konšierva
ne beredu se karobeli
ne ćuti se vuonj murtele
ni garifulih pod purtele
ure drugačije batiju
zvona na drugi muod zvonidu
ne provjodu se gončice
ne govori se obo introdi
svak za sebe
jedon za drugega ne mori
-Bože muoj
ča se ovo dogodilo
-vrime je svoje učinilo
a mi bismo ičili
da sve ostane
kako ča je bilo
Ča von se pari
kumpore
ča će bit
od ovie introde
-ne pitojte čamudrogo
ol’ ne vidite
da je sve bulono
Zamukli su glosi
izgosi se ogonj
ne dimi fumor
ruzina privazela
sve krakune i šćence
paučinon vitar mete
loza se inkantala
polma usahla
tičice odletile
maške utekle
škripjedu škure
cedijedu cakla
-somo svieti Antuonij stoji
kako ča je uvik sto
u kapelicu navar skol
Čarčojci čarčidu
bose noge
stinčice brojidu
okolo posa
tikvice zvonidu
molo žolo.
Molo jama
Velo jama
pagarešto!
skoč
ne čekoj
Uvik su mi bile droge
tičice
gledola son hi kako poskakuju
potancuju,kako stojidu
učas pul neba poletidu
slušola son hi kako kantaju
jedna drugu dozivaju
gledola son hi
kako gnjizda grodidu
joja čuvodu, mlode hronidu
puno su mi bile droge tičice
i uvik bi mi bilo žol
kad bi hi naš susid
u želondu čapo
i u kojbu daržo
Već je ni
a bila je dobota cili vik
otkad je naš otac
u vojništvo bi
polma u našemu dvuoru
kad bi govorit znala
ča bi sve ispripovidala
kako jorbul kuću je čuvala
tičicima gnjizda sakrivala
za pofale lišće darivala
sve je u našemu dvuoru bilo
okolo polme, pod polmu, iza polme
koliko se svita izminilo
koliko ričih izgovorilo
vina pritočilo
robe oprolo
ribe očistilo
sve pod polmu, okolo polme.
Pasovali su godišća
a polma uvik ista
svakemu je vrimenu
i nevrimenu odolila
– ma kad se kuća isproznila
kako da je sve ćutila
s namim je tugovala
i kopnila
svaki don sve veće u se išla
na manje dohodila
nakrivila se. osušila
od tugie dospila
već je ni
a bila je dobota cili vik
polma u našenu dvuoru
Navar glovie
klobuk
košuja s ošvicon
na botun
moli barci
rumeni obrazi
uvik vesel
dobre noravi
kako i svaki težok
poje je voli
ma i na konju
poštu po selima nosi
beštije liči
a nojveće od svega
unuke voli
Uvik je Boga molila
u crikvu hodila
namin dici bi govorila
-imojte puomnju od života,
Boga se buojte
paklene muke
su nojgora strahota,
a dobra dila
novjeća lipota-
i još nin je provjala
kako non je skula
puno dobro hodila
i da je meštrovica mogla bit
da je itila
ma se u nuonota Morkota namorala
i za cili svit
ne bi ga bila abandonala
S nonon je uvik
u poje hodi
lozjie,masline i smokve
s puno jubavi ašešti
jedini je u fameji fumo
španjulete son mu kupuvola
dobota svaki don
-i meni je tabak
lipo vonjo-
sestramin u Amerike
kad bi piso
navar nosa bi očole natakni
u crnilo pero moći
na tonkon korti
puno lipih ričih isloži
u konobu i pod taracu
balonce je daržo
sve bi miri i notovo
u jematvu nikad ne bi fermo
sve je na oku daržo
u svemu jušt i prov
a kad bi vino prodovo
bark bi mu se nasmijo
bi je vesel i kuntenat
od vina je živila
cila fameja