Bila son molo
još nison u skulu hodila
kad je moja teta
pud Amerik išla
zoč u Amerike
zoč tako daleko
na kroj svita
a vamo je sve zeleno
po kući su se svi vartili
ništa nisu govorili
somo je moja teta
bila kuntienta i vesela
posli son doznala
u Amerike je mlodega imala
ma je duošo onin nevuojni
Drugi rat
i ni se moglo putovat
kad je rat isvarši
po prokuri se odola
izvadila pašoj
i portila na vijoj
-brodon ča se Partizanka zvo
to mu je bi zodnji vijoj-
koliko je pismih
moja teta napisala
koliko paketih poslala
koliko je putih naša nona
isto pismo štila
koliko putih suzu pustila
a teta je pisala
da ne razbijemo glovu
da je tamo sve na botune
i da se po kući umorit ne moreš
sve i da hoćeš
ma je puno zemjie
a nindir stinie
ako hoćeš zašparenjat
po cili don tuko u poje lavurat
tako je moja teta
od jutra do mroka
u poje lavurala
uvik stinu iškala
stinu iškala
ma je ni nošla
sa stinuon u sarcu
zauvik zaspola